مين مقلش يا ارض اتشقى وابلعينى ؟ طفل العصر الحجرى

مين مقلش يا ارض اتشقى وابلعينى ؟ طفل العصر الحجرى
اسمع الحلقه صوت على ساوند كلود من هنا
اواستناها فيديو على قناتى اليوتيوب من هنا  (متنساش تدعمنى باشتراك)

ف مره حصل معايا موقف من المواقف اللى عمرى مهنساها

كان زمان . وزمان بالنسبالى اللى هوا من حوالى 10سنين مثلا مش متذكر الوقت بالظبط بس يعنى تقريبا كان عندى 10 11 سنه .

ف الوقت دا كان المكتب حاجه اساسيه ف حياه اى طفل

او الكتاب..

 للى ميعرفوش.. هوا شيخ دايما معاه عصايه وقاعد على كرسى او كنبه او مصطبه وقدامه اطفال معظم اعمارهم من 5 ل 15 سنه  بيحفظو وبيقرأو القرأن قدامه وف شباب بتساعده ف ان هى تسمع للاطفال دى المقرر بتاعهم اللى المفروض جايين من البيت حافظينه

وكنت هتلاقى ف وقتها المشهد دا متكرر..

 يعنى الوصف اللى بقوله ليك هتلاقيه وقتها ف اى كتاب تروحه من اسوان لاسكندريه.. دا لو احنا ف مصر يعنى وهتلاقيه متواجد اكتر ف القرى الريفيه والنجوع والاماكن دى

طبعا كل الاطفال دى بتتفادى ان الشيخ هوا اللى يسمعلها لانه دائما هذا الشخص لايرحم يعنى لو انت مش حافظ هيرسم بالعصايا لوحه عل جسمك

فكان الشباب اللى بيساعدوه كانو هما امل كل طفل تغافل عن حفظ المقرر المفروض عليه

 بان هما يدوله فرصه يراجع او ان واحد فيهم يعديك بكميه غلطات كان ممكن الشيخ يعلقك بسببها

وبدون ذكر اسامى علشان اكيد ف ناس حبايبنا بتسمعنى الوقتى ومش بعيد كمان يكون الشيخ نفسه كمان بيسمعنى

واحد من الشباب دول كان بيعزنى وقرر انه يترأف بحالتى المرسى لها ف هذا الوقت ويعدينى ومش مع غلطه او اتنين لا .. تقريبا كده مقلتش ايتين كاملين على بعض صح

وخلاص ياصحبى انا كده تمام تمام اروح بيتنا بدرى النهارده بقى وخلاص بفكر انا اول مهوصل البيت هعمل اى

انا هروح العب كوره ولا بقوللككمل جيم سبايدر مان ليفيل 4 امبارح الوحش قضى عليك لا انت هتركز النهارده وتخلص عليه 

انا اصلا عقلى خلاص بره المكان اللى اناا فيه انا موجود بجسمى بس انا دلوقتى اصلا بضغط على باور جهاز الكمبيوتر 

فاضل بس خطوه بسيطه وهى ان الشيخ يمضيلى على ورقه مكتوب فيها ان انا سمعت سوره الرعد وسوره ابراهيم ودى لحظه دايما مبتديش فيها خوانه كله بياخد الامضا وبيمشى

الا وان العبد لله يتفاجئ ويحدث ماليس فالحسبان

الشيخ يتمعن ف قراءه المكتوب تمعن شخص بيقرا بنود عقد امتلاك شقه بمدينه السادس من اكتوبر الجديده

ودى حاجه متطمنش

وتحليل الموقف دا لا يخرج عن احتمالين :

التحليل الاول : انه عارف مستوايا فالحفظ وانى من افشل الاطفال وقتها  اللى دايما كانو بيقعدو للاخر ف غريبه انه يمشى بدرى النهارده

او التحليل التانى : وهى  ان الكميه كبيره الواد دا اخره ربعين انما جزء لا فيها حاجه

وفلحظه التوتر دى يقولى انت سمعت علي مين ؟ قلتله س من الناس

هنا تحط احتمال تالت : انه شك فالشخص دا او مش واثق فيه ف انه قام بالواجب معايا

فعلشان يريح نفسه من الشكوك دى كلها كان الحل انى اعيد اللى سمعته عليه تانى او بمعنى اصح اللى ادعيت انى سمعته

خلاص خلصت انت كده فالباى باى الموقف بس ناقصه شيخ بعمامه الازهر يجى يقوللك وصيتك اى وينطقك الشهاده

هنا العبد المرحوم الفقير الى الله يتمنى بكل معانى الكلمه ان الارض تنشق وتبلعه

وفى الموقف والمكان مش هينفعه اى حد

بن تن فيلم الكارتون اللى كان بيستنى الحلقه بتاعته كل يوم مش هيجى يلف الساعه بتاعته و يتحول لوحش من الوحوش العشره ويخلصه من الموقف دا

ولا بطل الفيلم الاجنبى اللى كان بيتفرج عليه امبارح على  القناه التانيه وبسببه محفظش المقرر بتاعه هيلف اله الزمن اللى اخترعها ويرجعه بيها للعصر الحجرى

اللى مكنش فيه وقتها حاجه اسمها تعليم اصلا

الطفل كان يصحى الصبح يلعب او يساعد ابوه فتقطيع الشجر علشان يولعو نار يشوى بيها الغزاله  اللى اصتادوها  ويلعب تانى لحد ميتعب وينام

لا فوق وارجع تانى انت قدام الشيخ ناو وبيقوللك سمع سوره الرعد

اللى خلاص اصلا لو كنت فاكر منها حاجه اتنست حتى اول السوره مش فاكرها

ودانى الاتنين بيسخنو اكيد بقى لونهم احمر دلوقتى ودانى وانا عارفها

و ليه الجو حر كده لدرجه ان ابتديت اعرق

مع ان انا متاكد انى شفت فقره احوال الطقس ف الاخبار

مقلوش ان درجه الحراره هتبق عاليه لان احنا فى فصل الشتا اصلا

عادى يعنى مهما كتير بيقولو ان بكره فى سيول ومفيش حاجه

فيمكن ماخدوش بالهم ان فصل الصيف جاى يزورنا يوم وماشى 

بس تقريبا انا الوحيد اللى فالمكان حسيت بالحردا لانه مبنش غير على

وهنا عرفت انه لا امل ولااعلم مصيرى بعد مش اكتر من  5 ثوانى

ولاكن ..

 بكل صدق من داخل طفل عنده 11 سنه بيتمنى ان الارض تنشق وتبلعه

صوت جواه بيقول يارب انقذنى من الموقف دا لدرجه انه بدا الصوت جواه بيقول لو انقذتنى مش هسيب ولا صلاه ومش هسمع كرتون ولا هلعب على كمبيوتر الا لما اكون حافظ ومخلص اللى على

هنا شخص متابع الموقف اللى انا فيه و قاعد جمب الشيخ بمتر تقريبا كده ويقوله بضحكه خفيفه مش ممكن انسى تفاصيلها اى دا الواد وشه احمر

والموضوع اتقلب زى مقلب كده بشويه ضحك

بس انا لحد النهارده مش عارف اكره الشخص دا لانه ضحك على ولا مينفعش اكرهه لانه تقريبا دا تدبير ربنا اللى سمعنى

ولا اصلا كان تدبير ربنا ف ان الشيخ نفسه يغير رايه ودا مكنتش العاده

التفاصيل مش ممكن تحكمها باحتمالات

المهم

روحت البيت فتحت الكمبيوتر ولعبت اسبايدر مان وتقريبا كده مصلتش المغرب يومها برده واستنيت كرتون بن تن اللى مجاش انقذنى ف عز مانا محتاجله

وكملت حياتى عادى

وباى شكل من الاشكال مع اختلاف تفاصيل المكان والزمان الموقف دا حصل معانا كلنا

حتى اول محكيت الموقف دا لزميل لى قالى اتحطيط ف نفس الموقف

مش كتاب وشيخ وكده لا موقف يا ارض اتشقى وابلعينى

لما واحد قريبى مسكنى بعمل حاجه غلط وكنت متوقع انه هيقول لابويا وابويا لايرحم من يخطئ

بس اكتفى بانه يدينى نصايح ومواعظ وكنت ف الوقت دا بسمعه بكل كيانى ومقتنع بكل كلمه بس لما سابنى رجعت للغلط اللى كنت بعمله تانى

وتناقشنا فالموضوع دا ووصلنا بان المواقف والنصايح دى بتبق عامله زى ضربه العصايا مبتوجعش الا فالوقت اللى بتنزل فيه عل جسمك

و ان الانسان فالحالات دى بيكون جواه واحد تانى حقيقى هوا دا احنا اصلا بس لما ترجع للدنيا ومشاغلها يختفى الانسان الحقيقى اللى جوانا

ودا ميمنعش اننا برده مختلفين وان ف مننا ناس المواقف دى بتكون نقطه تحول ليها

وف نوع تانى المواقف دى مع الغلط بيفضل فاكرها وف اوقات بتمنعه من الغلط وف اوقات بينساها عامل زى ورقه الشجره اللى نسمه هوا ممكن توديها يمين او شمال

والنوع التالت بقى والاخير النوع اللى مبيتأثرش اصلا الا وقت الموقف وبعد كده بينسى ولا اكن حاجه حصلت

كانت مناقشه جميله الصراحه حبيت انى انقلها بانسب طريقه واتمنى انها تعجبكو